長者飲食 – 雙腳乏力就易跌親

長者飲食

隨住年紀增長，大部分老人家面對咀嚼同消化能力減弱嘅問題，覺得肉類難咬同消化，好易有食濟同消化不良嘅感覺，導致佢地傾向進食白粥、湯粉麵呢類易消化嘅食物，忽略左蛋白質攝取。蛋白質攝取太少會引致肌肉流失，老人家跌親嘅常因就係腿部肌肉太少，不足以支撐身體，雙腳乏力就易跌親。而長期蛋白質攝取不足令到身體製造嘅免疫細胞減少，削弱免疫力。

針對呢個問題，係預備食物時，可用免治瘦肉代替肉片加落粥或粉麵到，因攪碎過程幫助切細蛋白質組織，老人家容易咀嚼之餘，減輕胃部消化工作。除左肉類之外，豆腐、魚肉、蛋、奶類都屬於高蛋白質食物，例如豆腐粒蒸水蛋就適合咀嚼功能弱，唔鍾意食肉嘅長者。

因為長者嘅骨質流失速度快，建議長者每日飲用2份奶品，例如高鈣低脂奶或高鈣低糖豆漿，減慢骨質流失。而牛奶同豆漿都係蛋白質豐富嘅飲品，適合有咀嚼困難嘅長者透過流質補充蛋白質。要注意嘅係，腎功能減弱嘅長者應先咨詢醫生或營養師，分析身體狀況適唔適合飲用奶類或豆漿。

長者飲食上另一個常見問題係越食越鹹。因為長者嘅味覺神經細胞退化，導致味覺嘅感應差左，覺得食物唔夠味就落多啲調味料。加得太多鹽、雞粉、生抽、魚露呢類高鈉調味料，鈉攝取過多就會增加患高血壓嘅風險。世衛建議一個健康成年人士每日應攝取不多於2000毫克鈉質，即每餐應不多於1/3茶匙鹽調味。有需要嘅話可以用薑、蔥、蒜等天然調味料代替，而鹹魚、鹹蛋呢類醃製食物亦應盡量減少食用，有助維持血壓正常。